خلصناها و فضيناها ( أرجع أشتريها أو لا ) ~

السلام عليكم

صباح / مساء الخير 3>

بوست اليوم باين من العنوان ، منتجات خلصتها و رأيي فيها ولو حرجع أشتريها أو لا

::

 

صورة جماعية للمنتجات xD

::

 

شامبو DURU

 

أول مره اسمع عن الماركة دي ، بس كنت أبغى أجرب شي جديد

و لما شميت ريحته 3> 3> جميله مره على طول أخدته

عبارة عن 2*1 شامبو و بلسم بخلاصة اللؤلؤ للشعر العادي

للأسف ماناسبني أبدا ، جففلي شعري وسار لازم استخدم معاه بلسم

بس اللي صبرني عليه الين خلصته ريحته الجميلة ~

مارح أرجع اشتريه تاني أكيد

::

 

سائل الإستحمام المرطب من فازلين

بخلاصة الشوفان و حبوب الصويا

ترطيبه حلو مايجفف الجسم ، ريحته خفيفة

تعجبني منتجات فازلين ، جربت قبل كدا العودي أتوقع بالرمان و الوردي ودا أقل واحد حبيته

حرجع أشتريه بس مو نفس النوع ~

::

 

فاشكول - حمام زيت للشعر بخلاصة الفواكة

تستخدميه على شعرك و هو رطب و تخليه تقريباً 5 دقايق بعدين تشطفي شعرك

المفروض انه يرطب الشعر ويعطيه لمعان و قوة

ماحسيت استخدامه يفرق عن استخدام البلسم ، مجرد ترطيب و بس

يمكن يفيد الناس اللي شعورهم جافه و متضررة أكتر =\

بس بالنسبة لي ماحسيته فادني ~

مارح أرجع اشتريه تاني

::

 

مقشر التفتيح الطبيعي من نيفيا

يحتوي على فيتامين سي ، تستخدميه 2 -3 مرات أسبوعياً

للأسف اني اشتريته بعد ماجربته و عجبني عند أختي D:

لكن بعد مااستخدمته بفتره حسيته سار يجففلي بشرتي بشكل مو طبيعي

أول مااحطه أحس بشرتي جافه حتى يديني =(

مارح أرجع اشتريه تاني أكيد ، ولو بشرتك جافة أنصحك ماتاخديه ولا تفكري xD

::

 

زبدة الكاكاو من بالمرز

صديق الحوامل xD

عشان يخفف ظهور الستريتش ماركز ، يحتوي على فيتامين E و الكولاجين و زبدة الشيا

كان و مازال رفيقي في فتره الحمل

رح أرجع اشتريه تاني D:

::

كريم تحت العين من همالايا

المفروض انه يخفف الهالات و التجعدات و الخطوط الدقيقة

غالباً ماتوقع شي كتير من دي المنتجات ، لانه زي ماتهتمي بكريمات لبشرتك

المفروض يكون نظامك صحي + نومك مرتب عشان تلاقي نتيجة

عموماً حسيته يعطي ترطيب بس مو أكتر

 ومارح أرجع اشتريه تاني

::

Flake Away مقشر من سوب & قلوري

يعتبر من أشهر مقشراتهم

سبق و اتكلمت عنه في بوست منتجات سوب & قلوري

Soap & Glory Mini Products

اعتبره من مفضلاتي الدايمة

حأغير شويتين و ارجع اشتريه بعد فتره 3>

::

 

زبدة اليدين والقدمين من بودي شوب

نزلت عنها ريفيو كامل هنا لو حابين تشوفوه

Spa Wisdom Africa

رح ارجع اشتريها مع السكرب حقها ان شاءالله

::

 

كريم مرطب من غارنييه

جربت قبل كدا الوردي للبشرة الحساسة كان عادي وماحبيته كتير

ودا للبشره العادي و المختلطة ، حبيته أكتر

ريحته خفيفه و ترطيبه حلو تمتصه البشرة بسرعه و مايخليها تدهن

رح أرجع اشتريه تاني ~

::

بكدا يكون انتهى البوست

ان شاءالله تكونو استفدتو ، ولو جربتو أي شي من المنتجات ياريت تشاركوني تجاربكم

::

تسعدني متابعتكم في تويتر و انستاقرام

Rozalinda90

سلام ~