Volume Glamour Mascara

السلام عليكم 

صباح ، مساء الخير ~

::

بوست اليوم عن ماسكرا 

 VOLUME GLAMOUR .. BOURJOIS 

::

تجربتي معاه ~

- ماسكرا مكثفة للرموش

من طبقة وحدة تعطي لوك صباحي بسيط
وتقدري تحطي طبقتين أو تلاتة عشان توصلي لـ لوك  أكتر كثافة 

- الحلو فيها أنها مو تقيلة على الرموش ، ماتتكتل أو تتفتت بعد فترة

- فرشتها حلوة تفرد الرموش و ترفعها بشكل جميل

- ازالتها سهلة ، و دا من الايجابيات لو حتخليها ماسكرتك اليومية ~

أشوفها من أفضل الماسكرات اللي استخدمتها
و بعد ماجربتها استقريت عليها ، وسارت من مفضلاتي الدائمة  D:

::

السعر و مكان الشراء ~

متوفرة في فروع برجوا في سنتر بوينت
السعر ماافتكره للأسف :$

::

شاركوني رأيكم لو جربتوها ، و ايش ماسكراتكم اليومية المفضلة ~

سلام

رضاعة + ملعقة = أكل بدون حوسة xD

السلام عليكم ~
صباح / مساء الخير

::

بوست اليوم بتكلم فيه عن رضاعة الأكل ~

وهي الرضاعة اللي نهايتها تكون ملعقة للأطفال اللي بدأو ياكلو بدل الملعقة العادية و الصحن ~
بالنسبة ليا أحسها حلوة و عملية مره بالذات لو كنت برا البيت بدل الحوسه و اللغوصة

::

جربت نوعين منها

النوع الأول ~

- الصورة من النت , رميت حقتي قبل ماصورها =( -

||
من ماركة Munchkin ، مصنوعة من السيليكون
حجمها صغير ، لما يبدا ياكل كميات كبيرة أتوقع مارح تكون عملية كتير
حلوة لما تأكلي البيبي ، سهلة في الضغط و مرنة
لونها حلو و متوفر منها لون أخضر ووردي اعتقد كمان
وأحلى شي معاها غطا خاص ~

بس مشكلتها استخدمتها كم مره و بعدين سارت ريحتها مو حلوة
قد ما غسلتها و عبيتها صابون مارضيت تروح منها الريحه للأسف

::

النوع التاني ~

من ماركة بايجون ، مصنوعة من البلاستيك ~
حجمها أكبر , عملية أكتر و مناسبة لعمر أكبر كمان
مو بمرونه السيلكون اكيد لكنها سهله في الاستخدام برضو
يمكن شكلها مو جذاب كتير ومو متوفر منها غير شكل واحد

عيبها انه مامعاها غطا خاص ~
و بالنسبة للريحة الحمدلله ماواجهتني المشكلة دي معاها


بالتالي اعتبرها الخيار الأفضل بن الاتنين

::

ان شاءالله تكونو استفدتو من البوست ~

سلام

Japanese Cherry Blossom - BBW

السلام عليكم 

صباح / مساء الخير ياجميلات ~

::

بوست اليوم عن مجموعة
Japanese Cherry Blossom  

من Bath & Body Works ~

::

المجموعة جاتني هدية
عبارة عن عطر الجسم و شور جل و اللوشن محطوطه في علبة لزوزة
< نسيت اصورها للاسف XD

::

بشكل عام احس ريحتها زهرية قوية و منعشة 
أول ماتحطيها تحسيها نفاثة و مع الوقت لما تهدا تسر أحلى

حسب الموقع
الريحة مزيج بين الكرز الياباني و التفاح و الكمترى مع الفانيليا < وصفة مو عطر XD

::

اللوشن ~

يحتوي على فيتامين E المرطب ، بالإضافة إلى زيت الجوجوبا 
امتصاصه عالي و قوامه خفيف على البشرة زي أغلب اللوشنات حقتهم

::

معطر الجسم ~

الريحة زي ماوصفتها فوق , ثباتها متوسط  ومع استخدام بقية المجموعة يزيد الثبات لكن عموما ماحسه أكتر تلاتة ساعات

::

الشورجل ~

ريحته زي بقية المجموعة ، منعش
يحتوي على الصبار و فيتامين E بالإضافة لزبدة الشيا 
ودا أحلى شي فيه لأنه ما يجفف البشرة ، خفيف على الجسم ~

::

الأسعار و أماكن الشراء ~
الاسعار ماعرفها لأني زي ماقلت جاتني هدية ~ وناسية أسعار المكان عموما
و تلاقوها في أي فرع من فروع باث اند بودي 

::

ان شاءالله تكونو استفدتو 3>
سلام ~