Sweet Pea ~ BBW

السلام عليكم ~

بوست اليوم عن وحده من مجموعاتي المفضلة من 

Bath & Body Works 

::

Sweet Pea



اللي عندي اللوشن و معطر الجسم ~
واعتقد متوفر منها كمان شورجل و سكرب لو مني ناسيه =D

::

الريحة بشكل عام منعشة و حيوية ، بين الحلويات و الورود < مدري كيف xD
حسب الموقع : هي مزيج بين التوت و الكمثرى و الورد ~
ماعرف اوصف الروايح لكن لا تفوتي فرصة انك تجربيها لو زورتيهم

::

 

معطر الجسم ~

ريحته زي ماوصفتها فوق , متوسطة القوة
تحسي نفسك منتعشة و نابضة بالحياة لما تحطيه
حجمه كبير يطول عندك يعني ( 236 مل )

الثبات مع اللوشن : تقريبا 3 ساعات
ممكن تستخدمي باقي المنتجات لو حابه الريحة تثبت أكتر ~

::

 

اللوشن ~

يحتوي على فيتامين E و زيت الجوجوبا
خفيف القوام ، ترطيبه متوسط و يخلي البشرة ناعمة
امتصاصه عالي مايعطي الاحساس التقيل على الجسم

::

بالنسبة ليَ ، اعتبرها من الروايح المفضلة عندي دايماً ، و تفكري بذكريات جميلة 3> 3>
من جد لما تستخدميهم تحسي نفسك فريش ونفسيتك متجددة  D:

الأسعار و مكان الشراء :
أي فرع من فروع Bath and Body Works

معطر الجسم : 75 درهم
اللوشن :60 درهم

::

سلام ~

 

Spa Wisdom Africa - زبدة اليدين و القدمين ~

السلام عليكم ~

بوست اليوم عن منتج من منتجات بودي شوب برضو D:

::

Spa Wisdom Africa
Honey & Beeswax Hands & Foot Butter



مجموعة السبا الأفرقية
تتكون من " مقشر - زبدة - زيت للجسم "
بس كل منتج ينباع بشكل منفصل < مدري لو تنباع على شكل مجموعة سوا أو لا :$

::

المنتج اللي عندي و البوست عنه اليوم هو الزبدة ~
أول مااشتريتها اخدتها بالغلط , كنت أبغى السكرب بس مع السرعه مانتبهت و اخدتها
عشان كدا ماكنت متحمستلها في البداية - بالذات انه ماكنت أحتاج وقتها أي كريم أو زبدة زياده -__-"

لكن لما جا دورها و بدأت استخدمها
وقعت في غرامها 3> 3>

المنتج عبارة عن زبدة لليدين و القدمين و المناطق الجافة في الجسم ( الأكواع و الركب )
تتكون من العسل و شمع النحل
ترطيبها عالي ، يمتصها الجسم كويس و ماتسيب الاحساس التقيل عليه
< بالنسبة ليا في اليدين امتصاصها كان اخف من باقي المناطق :|

ريحتها استرخاآآآآآآآآآآآآآآآآآآآء
يعني تحطيها بعد الشور تحسي جسمك مسترخي بقوة ، لايق عليها تكون مجموعة سبا xD

و كمان العلبة حقتها جميلة و تقدري تستفيدي منها بعد ماتخلص D:
 

 

هنا الصورة توضح قوام الزبدة ، تقيل طبعا
وحسيته أتقل من بعض الزبدات الموجودة في السوق ~

::

بشكل عام وبما اني من عشاق الإسترخاء حبيتها كتير
و بعد ما جربتها ماندمت عليها أبدا ~ جات من ربنا الغلطة وإني أخدتها xD

::



مكان الشراء و السعر :
طبعا موجودة في أي فرع من فروع بودي شوب
السعر اعتقد في حدود الخمسين - مشتريتها من فتره ماتذكر بالزبط :$

::

سلام ~

مجموعة فيتامين e ~

السلام عليكم

بوست اليوم عن مجموعة فيتامين E للعناية بالبشرة من The Body Shop

::

 

 

المجموعه اللي عندي هي الميني ، تتكون المجموعة من أربعة أشياء في شنطة صغنونه < ماصورتها :$

- غسول كريمي

- تونر مرطب

كريم مرطب

- كريم الليل

::

 

الغسول الكريمي :

ينظف البشرة تنظيف خفيف - مو بعمق -

عشان كدا سرت استخدم معاه آله سيقما و خليته من روتين الليل

لأنه أبغى شي لطيف على البشرة أكتر من انه تنظيف عميق ~

::

التونر :

حبيته أكتر من الغسول ، مو زي أغلب التونرات اللي بعد ماتستخدميها تشد البشرة

بالعكس مهديء و يرطب البشرة ، و تحسيها بعده تسير لينه و ناعمة ~

ولو كان بارد أحلى شي xD

::

 

الكريم المرطب :

خفيف على البشرة تمتصه بسرعه بدون مايترك أثر دهني

ريحته خفيفه ~ ترطيبه كويس

استخدمه أي وقت أبغى أرطب بشرتي و حتى قبل الميك اب ~

::

كريم الليل

بالنسبة ليا ماحبيته

حسيته تقيل وماتمتصه البشرة بسرعه , ريحته قوية

اتوقع يكون أحسن لصاحبات البشرة الجافة

::

بشكل عام ~

حبيت المجموعة / حجمها حلو للسفر و لطيفة على البشرة بعد ماتستخدميها تحسي بـ نضارة و نعومة في البشرة - زي بشرات الأطفال

كريم الليل هو الوحيد اللي ماحبيته #__#

::

السعر و مكان الشراء :

في أي فروع من فروع بودي شوب
السعر مو فاكرته للأسف :$

::

سلام ~

Soap n' Glory Products

السلام عليكم ~

صباح / مساء الخير ياجميلات

::

في بوست اليوم بتكلم عن منتجين من سوب اند قلوري العشق الأبدي 3> 

::

The Righteous Butter - Body Lotion

Scrub "em & Leave "em - Body Buff

 

::

المنتج الأول  3>

The Righteous Butter - Body Lotion

يحتوي اللوشن على زبدة الشيا و بذور الكاكاو بالأضافة إلى مزيج من زيت اللوز الحلو و الورد و الصبار مع الفانيليا و الخوخ

 ترطيبه عالي حتى للمناطق الجافة زي الركب و الأكواع ، وتحسي بعده بنعومة و طراوة xD

استخدمه دايماً بعد الشور / ريحته بالنسبة جميلة و منعشة

< مدري كيف اوصفها بس ماحس يبين فيا اي شي من اللي فوق D:

حبيته و أتوقع أرجع اشتريه من فتره للتانية 3>

::

المنتج التاني
 Scrub "em & Leave "em - Body Buff 

 

يحتوي على الأملاح البحرية بالإضافة إلى زيت اليوسفي و الجوجوبا المرطبة

يقشر الجسم كويس و يرطبه على خفيف
حبيبات التقشير كميتها حلوة و لونها بينك 3> 3> يعني يفتح النفس D:

حلو السكرب بس ماحسيته مميز و ماتوقع ارجع اشتريه تاني

::



الأسعار و أماكن الشراء :

من صيدلية بوتس - الصيرفي مول في جدة
طبعا الاتنين اخدتهم أحجام صغيرة

اللوشن 45 ريال ، و المقشر 20 ريال

::

همسة على السريع / منتجات سوب اند قلوري تتميز بروايحها القوية ، عشان كدا قبل ماتشتري أي منتج منهم حاولي تشمي ريحته مو بس على المدح لأنه ممكن ماتناسبك أو تكون قويه عليكِ ;)

سلام (F) ~

مقشر و شورجل FARMASI ~

السلام عليكم

صباح / مساء الورد (F) ~

::

بوست اليوم بريحة التوت D:

مقشر و شورجل Farmasi

Farmasi

هي المسمى التجاري لشركة شركة تاناليزه التركية المختصة في مستحضرات التجميل

هنا موقعهم لو حابين تتعرفو اكتر على الشركة و منتجاتها

FARMASI

::

مقشر فارمسي بالتوت

طبعا عندهم نكهات متنوعة بس انا أخترت التوت

ريحته حلوة و فواحة ، حبيبات التقشير حسيتها كأنها قليلة

والغريبة إنها ماتدوب على قد ماجلست أفرك -_-"

استخدمه تلاته مرات في الأسبوع

عن نفسي / ماعتبره السكرب المفضل عندي كـ قوام

بس ممكن يكون بديل مؤقت و تغيير من فتره للتانيه ( عشان ريحته حلوة xD )

بما انه موجود في الصيدليات و سعره مناسب

::

شور جل فارمسي بالتوت

نفس الشي ، متوفر بعدة نكهات

ريحته نفس السكرب حلوة و قوامه حلو مايجفف الجسم

اهم شي ماتتحمسي وانتي بتضغطي عليه عشان ماينزل كميات كبيرة

::

طبعا الشركة توفر معطرات جسم

ممكن تستخدميها سوا عشان تثبتي الريحة أكتر

اشتريتها من صيدلية الدواء - أتوقع متوفر في أغلب الصيدليات -

::

ان شاءالله يكون عجبكم البوست و استفدتو منه 3>

سلام

THANX 2013 ~ HELLO 2014

السلام عليكم ~

صباح / مساء الخير ياجميلات
عارفة انه مره بدري على البوست دا xD
شكلي آخر انسانة في العالم سوته ، بدأت السنة وخلصنا شهرين كمان :$

||

أول شي سنة حلوة عليكم كلكم يارب
وإن شاءالله كل سنة تكون أحلى و أكتر إنجاز و سعادة من اللي قبلها يارب 3>

بالنسبة ليا سنة 2013 كانت الحمدلله مليانة أشياء حلوة
عشان كدا لسه ابغى انزل البوست ، وأسجل اللحظات الجميلة في مدونتي xD ~

------

من أجمل الأشياء اني فتحت البلوق حقي والحمدلله  3>



::

 خلصت الجامعة - البكالوريوس - واتخرجت ماشاءالله  D:

 

::

قدمت بحث التخرج في المؤتمر الرابع لوزارة التعليم العالي
والحمدلله فاز بالمركز الأول :D:D:

 

::

قضينا سفرة عائلية جميلة في دبي 3>
اتبسطنا وسوينا كل اللي في بالنا ، بس لو ناقصنا أختي الكبيرة للأسف
< ان شاءالله المرات الجيه يارب ~

 

::

سوولي اهلي أحلى حفلة توديع عزوبية - Bridal Shower - مفاجئة xD
هنا تقرير كامل عنها لو حابين تشوفوه
Bridal Shower Party


::

كانت 2013 سنة زواجي من شريك حياتي و نصفي التاني 3>
الله يخلينا دايماً لبعض يارب 3>

::

قضيت أجمل شهر عسل في جزيرة موريشوس 3>
< ان شاءالله ناويه انزل تقرير عنها :$

 

::

وأخيراً قضيت فترة جميلة من حياتي في نيوزيلندا D:

 

 

||

و أكيد طبعاً أي سنة ماتخلو من ان الواحد يتعلم فيها أشياء أكتر و يسير أقوى في مواجهة المواقف ، ويكتشف أشياء أكتر في نفسه و اللي حوليه ~
اهم شي اني عرفت مين الناس اللي حلاقيهم معايا دايماً ، و مين صديقاتي الحقيقيين 3>

في أشياء كتيرة بس نزلت الأبزر ومابغى ازودها و أتاخر زياده xD
بجد الحمدلله على دي السنة الجميلة 3>

::

شكرراً لكل الناس اللي كانو معايا و دعموني في كل شي ، احبكم كلكم 3> 3>

والله يجعل أيامكم كلها سعادة يارب 3>

سلام ~



Tag : Love Your Life

السلام عليكم ~

صباح / مساء الورد ياجميلات

من زمان على البلووق ، بس ظروف خارجة عن إرادتي -_-"
ان شاءالله آخر الغيبات لأنه من جد وحشني 3>

::

بوست اليوم عبارة عن تاق ، واللي اختارتني البلوقر الجميلة NOUDA

 

::

القوانين :

- التصريح بأن التاق من ابتكار ♥ Love Your Life .

- أختار 5 بيوتي بلوقرز للمشاركة في التاق .

- عنوان الموضوع باسم التاق .

::

يلا نبدأ ~

1)  أفضل عطر صبآحي و مسائي ؟

مع اني دي الفترة مو مره مع العطور X|

للصباح / Sweet Pea - BBW

للمساء /  Eaudemoiselle - Givenchy

2)  أكثر منتج مهم عندك ؟

ميك اب / بودرة الحواجب من بودي شوب
عناية / كريمات الترطيب وحالياً استخدم The Righteous Butter
و أكيد آلة سيقما 3> 3>  < سارت منتجات مو منتج XD

3)  قنوات تحبين تتابعينها ؟

مو كتير أتابع التلفزيون لوحدي ، لو أحد معايا ممكن اتحمس ~

4)  ايش السبب اللي خلاك تفتحين المدونة ؟

شي جميل يكون عند الواحد مساحة خاصة بيه و يشارك غيره في الأشياء اللي يحبها
والأجمل لما تحسي من جد أنك بتفيدي غيرك وأنتي في نفس الوقت مستمتعة D":

5) رياضتك المفضلة ؟

تنس الطاولة + تمارين اللياقة D:

6) قطعة ملابس مفضلة عندك ؟

الفساتين القصيرة 3>

7) أكثر شي تسوينه وقت فراغك ؟

على حسب المزاج بس دي الأيام غالباً تصفح نت و أفلام

8) وقتك المفضل ؟

الصباح روقان وهدوء ~ بس أهم شي أكون نايمه كويس ولا مارح أسيب السرير xD 

9) شي مهم يكون معاك قبل ماتخرجي ؟

شنطتي كلها مهمة D: ، لو شي واحد أكيد الجوال 3>

10) مشروبك المفضل ؟

عصير برتقال :$

::

بكدا أكون خلصت ~ والبلوقرز اللي بعدي :

Mimizstyle
Lamis Beauty
Glamour
FashNana
alanoudbeauty

سلام ~