Papaya & Mango Natural Collection

السلام عليكم ~

صباح / مساء الخير ياجميلات ~

بوست اليوم عن مجموعة البابايا و المانجا من بوتس ~

طبعا بوتس عندهم عرض دي الفترة تشتري منتجين و التالت مجاناً ;)

::

Natural Collection  - Papaya & Mango

أول مره اشتري مجموعة بدي الريحة ، جمييله و صيفيه و منعشة

في البداية كنت حاخد الفراولة بس بعد ماشميت دي حبيتها أكتر و حسيتها جديدة عليا 3> 3>

طبعا المنتجات ماتنباع بشكل مجموعة كل منتج لوحده

اعتقد كان في أشياء تانيه شور جل و غيرها بس دول التلاته اللي أخدتهم

::

Papaya & Mango Body Scrub

أحسه سكرب مع شورجل ، هوا لطيف على البشرة و حبيبات التقشير زي احساس

السكر لما تستخدميه في سكرب فيها نوع من الخشونة  < كيف الوصف بس xD

احس تقشيره سطحي ، وعن نفسي أحب السكربز اللي أحسها تنظف بعمق أكتر من كدا

مارح ارجع اشتريه تاني ~

::

Papaya & Mango Body Spray

ريحته جميلة تعطيك احساس بالانتعاش 3>

صيفية ~ و مو من الروايح القوية اللي تخنق ~

::

Papaya & Mango Body Cream

دا أكتر منتج وقعت في غرامه 3>

الكريم الخطير قوامه كأنو خليط كريم مع جل ، أول مره اجرب كريم زي كدا

لما تحطيه يعطي احساس بالبرودة ، يمتصه الجسم بسرعه

ترطيبه خفيف لمتوسط

حبيته فكرته و احسه مناسب للصيف مره 3>

::

هنا حاولت أبين قوام الكريم ، شكله مشهي

للأسف مو مره واضح بس يعني ممكن تتخيلوه مع الوصف ^^"

::

الأسعار و مكان الشراء :

صيدلية بوتس

السكرب : 34 ريال ـ الكريم : 38 ريال

معطر الجسم مجاني عشان العرض ، بس في حدود التلاتين ريال سعره تقريباً

::

ان شاءالله يكون عجبكم البوست

تسعدني متابعتكم ليا في تويتر + انستاقرام

Rozalinda90

سلام ~

 

Haul : مشترياتي من أمريكا ~

السلام عليكم ~

صباح / مساء الخير ياجميلات 3>

::

اللي متابعينني عارفين ان الفترة اللي فاتت كنت في أمريكا

و أهم شي نشتري شويه ميك اب و حركات :$

بوست اليوم عن مشترياتي من أمريكا ~

المشتريات نصها من موقع درق ستور ، لانه في بالي اجربه بس شايله هم الشحن و كدا
فاستغليت الفرصة بما اني هناك و طلبت منهم ~

http://www.drugstore.com/

و الباقي من أماكن مفرقة ~

أغلبها لسه ماجربتها ولا بدأت استخدمها ، ان شاءالله بعدين رح انزل عنها ريفيوز مفصلة D:

::

مجموعة من  BURT'S BEES

مكونة من ستة أشياء :

كريم لليد + مرهم لليد اخف من الكريم + و كريم تاني لليد بالشمع قوامه تقيل حتى اتقل من الزبدات + كريم للرجول + كريم للكيوتيكل + مرطب للشفايف

::

ألوان للشعر و ممكن تستخدم على البشرة

من زمان نفسي أجرب ألوان الشعر و حسيت دي مجموعة حلوة فيها أكتر من لون

وحبيت فكرتها تلفي القلم من تحت و يطلع اللون ، بس ان شاءالله تكون كويسه xD  

::

منتجات الأظافر ~

مناكير عودي من Cover Girl + مناكير اورانج من Revlon

جل مزيل للكيوتيكل + أصباع مناكير للفرنش من Sally Hanson ~

::

باليت شدوهات + باليت هايلايت وردي بشيمر من Wet & Wild 

 باليت شدوهات نيود من Physicians Formula

::

منتجات الشفايف ~

::

المرطب الشهير ESO بالرمان

محدد شفايف من Rimmel

روج بينك + مرطب من Cover Girl

و روج مات لونه عودي من elf

::

وأخيراً ~ الشي اللي من زمان نفسي أجربه - أرواج Wet & Wild -

كنت محتاره في الدرجات ، كتير منها عجبتني  ~

والجميلة سارة من مدونة Saraallmakeup ، اقترحت عليا كم لون

في النهاية قللتهم لدول الخمسة 3>

::

و بس بكدا يكون انتهى البوست ~

زي ماقلت ان شاءالله رح اسوي ريفيوز مفصلة أكتر عن المنتجات قريب

/

تسعدني متابعتكم في تويتر + انستاقرام

Rozalinda90

سلام ~

 

مجموعة العناية باليدين من Soap & Glory ~

السلام عليكم ~
صباح / مساء الخير ياجميلات
::



بوست اليوم عن
مجموعة العناية باليدين من سوب اند قلوري 3> 3>

المجموعة تجي في علبة جميلة ، مكونة من :

- ماسك مرطب لليدين
- كريم اليدين الشهير " Hand Food "
- قفازين
-مبرد - لبرد و تلميع الأظافر 

Endless Glove

عبارة عن ماسك مرطب + كريم لليدين
يدخل في تركيبه عدة زيوت منها المكاديما و زيت بذور العنب و الرمان + زبدة الشيا
ريحته جميلة و مميزة وهادية في نفس الوقت
انا استخدمه كماسك لليدين ، يخلي يدك مرطبة و ناعمة لفترة طويلة 3>
انصح اللي يعانو من جفاف في اليدين يشتروه بدون تردد ~

طريقة الاستخدام :
حسب المكتوب على العلبة : تحطيه على يدك و بعدها تلبسي القفازات وقت النوم
عشان تخليها أطول فترة ~
عن نفسي احطه و اخليه من ساعه لساعتين بس
< ماستحمل اجلس بالقفازات فترة طويله خخ xD

دي القفازات , شكلها كيوت 3>



Hand Food

أشهر كريم في سوب اند قلوري يمكن D:
  يحتوي على المكاديميا و زبدة الشيا و المارشميلوترطيبه عالي و ريحته مميزة
< اول مااشتريته ماعجبتني ، بس بعدين حبيتها و دي تاني مره اشتريه 3> 3>

 

أخيراً ، مبرد الأظافر
جهة لبرد الأظافر و التانية لتلميعها 3>

عن نفسي حبيتها كتير , أحسها مجموعة عناية و تدليل لليدين و تحل مشكله الجفاف 3>

::

الأسعار و أماكن الشراء :


أخدتها من فنره من بوتس فرع دبي ماعرف لو لسه موجوده أو لا
والسعر تقريباً في حدود 100 درهم < مو فاكرة كويس :$

::

إن شاءالله يكون عجبكم البوست ~

تسعدني متابعتكم على تويتر و انستاقرام

Rozalinda90

سلام ~

Sephora Haul - Benefit -

 

 

السلام عليكم ~

أول مره أسوي بوست عن مشترياتي

عشان كدا اخترت اقصر شي كبداية ~ وإن شاء في كم بوست لسه فس بالي D:

::

بوست اليوم عن مشترياتي من سيفورا ~

كل المنتجين من بينيفت و هيا أصلا أشياء كانت في لستتي وأبغى أجربها ~

و الحمدلله أخيرا روحت سيفورا و أخدتهم xD

::

HELLO FLAWLESS FAONDATION

أساس للبشرة - Oil Free - يعني مناسب للبشرات الدهنية و المختلطة

في عدة درجات منه خمسه أو سته < مني فاكرة ~

التغطية حقته متوسطة

يحتوي على فيتامين E + C عشان يمنع علامات التقدم في السن ~

وفي العلبة نفسها كان في عينة من البرايمر حقهم D:

::

The Pore Fessional Zero Shine Agent

بودرة لتخفيف اللمعان ~

الفترة الأخيرة سارت منطقة التي زون عندي دهنية أكتر و تقهرني

وتقريبا كل ساعتين أحتاج أحط بودرة عشان يغطي اللمعان =(

عشان كدا أول ماسمعت عن المنتج حطيته في لستتي  3>

التعليب حقها جميــــــــــــــــل 3>

من فوق المنتج عادي بودرة تلفيها و تصبي في الغطا قد ماتحتاجي و من تحت الفرشاة حقتها

و دا أحلى شي ، جمعو البودرة و الفرشة في منتج واحد شكله كيوت 3>

جربتها تجربه سريعة ~ تقريباً جلست بيها أربعه ساعات وماشفت أثر للمعان

::

الأسعار و مكان الشراء ~

سيفورا البحرين
الأساس : 17.7 دينار بحريني ، البودرة : 14.7 دينار بحريني

الحساب كله = 32.4 تقريباً 324 ريال

::

و راحو منتجين من اللسته حقتي xD ~

ان شاءالله حجربهم و أنزل عنهم ريفيوز بعد كدا ~

وبكدا يكون انتهى البوست ~ سلام



Sweet Pea ~ BBW

السلام عليكم ~

بوست اليوم عن وحده من مجموعاتي المفضلة من 

Bath & Body Works 

::

Sweet Pea



اللي عندي اللوشن و معطر الجسم ~
واعتقد متوفر منها كمان شورجل و سكرب لو مني ناسيه =D

::

الريحة بشكل عام منعشة و حيوية ، بين الحلويات و الورود < مدري كيف xD
حسب الموقع : هي مزيج بين التوت و الكمثرى و الورد ~
ماعرف اوصف الروايح لكن لا تفوتي فرصة انك تجربيها لو زورتيهم

::

 

معطر الجسم ~

ريحته زي ماوصفتها فوق , متوسطة القوة
تحسي نفسك منتعشة و نابضة بالحياة لما تحطيه
حجمه كبير يطول عندك يعني ( 236 مل )

الثبات مع اللوشن : تقريبا 3 ساعات
ممكن تستخدمي باقي المنتجات لو حابه الريحة تثبت أكتر ~

::

 

اللوشن ~

يحتوي على فيتامين E و زيت الجوجوبا
خفيف القوام ، ترطيبه متوسط و يخلي البشرة ناعمة
امتصاصه عالي مايعطي الاحساس التقيل على الجسم

::

بالنسبة ليَ ، اعتبرها من الروايح المفضلة عندي دايماً ، و تفكري بذكريات جميلة 3> 3>
من جد لما تستخدميهم تحسي نفسك فريش ونفسيتك متجددة  D:

الأسعار و مكان الشراء :
أي فرع من فروع Bath and Body Works

معطر الجسم : 75 درهم
اللوشن :60 درهم

::

سلام ~

 

Spa Wisdom Africa - زبدة اليدين و القدمين ~

السلام عليكم ~

بوست اليوم عن منتج من منتجات بودي شوب برضو D:

::

Spa Wisdom Africa
Honey & Beeswax Hands & Foot Butter



مجموعة السبا الأفرقية
تتكون من " مقشر - زبدة - زيت للجسم "
بس كل منتج ينباع بشكل منفصل < مدري لو تنباع على شكل مجموعة سوا أو لا :$

::

المنتج اللي عندي و البوست عنه اليوم هو الزبدة ~
أول مااشتريتها اخدتها بالغلط , كنت أبغى السكرب بس مع السرعه مانتبهت و اخدتها
عشان كدا ماكنت متحمستلها في البداية - بالذات انه ماكنت أحتاج وقتها أي كريم أو زبدة زياده -__-"

لكن لما جا دورها و بدأت استخدمها
وقعت في غرامها 3> 3>

المنتج عبارة عن زبدة لليدين و القدمين و المناطق الجافة في الجسم ( الأكواع و الركب )
تتكون من العسل و شمع النحل
ترطيبها عالي ، يمتصها الجسم كويس و ماتسيب الاحساس التقيل عليه
< بالنسبة ليا في اليدين امتصاصها كان اخف من باقي المناطق :|

ريحتها استرخاآآآآآآآآآآآآآآآآآآآء
يعني تحطيها بعد الشور تحسي جسمك مسترخي بقوة ، لايق عليها تكون مجموعة سبا xD

و كمان العلبة حقتها جميلة و تقدري تستفيدي منها بعد ماتخلص D:
 

 

هنا الصورة توضح قوام الزبدة ، تقيل طبعا
وحسيته أتقل من بعض الزبدات الموجودة في السوق ~

::

بشكل عام وبما اني من عشاق الإسترخاء حبيتها كتير
و بعد ما جربتها ماندمت عليها أبدا ~ جات من ربنا الغلطة وإني أخدتها xD

::



مكان الشراء و السعر :
طبعا موجودة في أي فرع من فروع بودي شوب
السعر اعتقد في حدود الخمسين - مشتريتها من فتره ماتذكر بالزبط :$

::

سلام ~

مجموعة فيتامين e ~

السلام عليكم

بوست اليوم عن مجموعة فيتامين E للعناية بالبشرة من The Body Shop

::

 

 

المجموعه اللي عندي هي الميني ، تتكون المجموعة من أربعة أشياء في شنطة صغنونه < ماصورتها :$

- غسول كريمي

- تونر مرطب

كريم مرطب

- كريم الليل

::

 

الغسول الكريمي :

ينظف البشرة تنظيف خفيف - مو بعمق -

عشان كدا سرت استخدم معاه آله سيقما و خليته من روتين الليل

لأنه أبغى شي لطيف على البشرة أكتر من انه تنظيف عميق ~

::

التونر :

حبيته أكتر من الغسول ، مو زي أغلب التونرات اللي بعد ماتستخدميها تشد البشرة

بالعكس مهديء و يرطب البشرة ، و تحسيها بعده تسير لينه و ناعمة ~

ولو كان بارد أحلى شي xD

::

 

الكريم المرطب :

خفيف على البشرة تمتصه بسرعه بدون مايترك أثر دهني

ريحته خفيفه ~ ترطيبه كويس

استخدمه أي وقت أبغى أرطب بشرتي و حتى قبل الميك اب ~

::

كريم الليل

بالنسبة ليا ماحبيته

حسيته تقيل وماتمتصه البشرة بسرعه , ريحته قوية

اتوقع يكون أحسن لصاحبات البشرة الجافة

::

بشكل عام ~

حبيت المجموعة / حجمها حلو للسفر و لطيفة على البشرة بعد ماتستخدميها تحسي بـ نضارة و نعومة في البشرة - زي بشرات الأطفال

كريم الليل هو الوحيد اللي ماحبيته #__#

::

السعر و مكان الشراء :

في أي فروع من فروع بودي شوب
السعر مو فاكرته للأسف :$

::

سلام ~